«Bavariya» yozgi transfer oynasida Bryan Saragosidan ayrilish rejasini tuzmoqda. Ispaniyalik qanot o'yinchisi Myunxen klubining kelgusi mavsumdagi rejalari ichiga kirmaydi.
Orgullobiri ma'lumotlariga ko'ra, 24 yoshli futbolchiga «Sevilya», «Alaves» va «Espanyol» qiziqish bildirmoqda. Hozircha hech bir klub rasmiy taklif yubormagan, ammo o'yinchi atrofidagi vaziyat diqqat bilan kuzatilmoqda.
O'tgan mavsum Saragosa uchun juda muvaffaqiyatsiz o'tdi. U mavsumning birinchi yarmida «Selta»da ijarada o'ynadi, qishda esa «Roma»ga o'tdi. Tizzasidagi muammolar sababli ispan futbolchisi Rimda joylashib ololmay, mavsumning ikkinchi yarmida atigi 4 ta o'yinda maydonga tushdi.
Potentsial nomzodlar Saragosani imzolashdan oldin futbolchining jarohatlardan to'liq tiklanganligiga ishonch hosil qilmoqchi.
