Zagrebning «Dinamo» jamoasining hujumchisi Diyon Drene Belio bir nechta Angliya Premer-ligasi klublarining ro'yxatida. Bu ma'lumotni TEAMtalk e'lon qildi.
Manbaning ma'lumotlariga ko'ra, hozirda 24 yoshli hujumchining nomzodini «Manchester Yunayted», «Tottenhem», «Everton» va «Brentford» jamoalari o'rganmoqda. Hozircha muzokaralar yoki takliflar haqida gap ketmayapti. Hozirda klublar o'yinchining muvaffaqiyatlarini kuzatmoqda va uning haqida ma'lumot to'playapti.
Joriy mavsumda Belio barcha musobaqalarda 13 o'yinda 12 gol urdi. Shuningdek, hujumchining hisobida oltita golli uzatma mavjud.
Belioning «Dinamo» bilan amaldagi shartnomasi 2030 yilgacha davom etadi. Transfermarkt mutaxassislari o'yinchini 15 million evroga baholamoqda.