Chernogoriyalik hujumchi Stevan Jovetic o'zining o'tgan o'n yillikning boshlarida Madridning «Real» klubi tomonidan taklif qilinganini va o'shanda bu taklifni rad etganini aytib berdi. U hozirda bu qaroridan afsusda.
«Ehtimol, bitta qaror bor, uni yana qabul qilmas edim. Men «Fiorentina»da ikkinchi mavsumimni o'tkazayotganimda, Madridning «Real» klubi meni qiziqtirgan edi, lekin o'shanda bunday transferga tayyor emasligimni his qilardim. Men muntazam o'ynardim, baxtli edim, ishlarim yaxshi ketayotgan edi va o'ylardim: «Yana bir-ikki yil shu yerda qolaman, keyin ketaman». Natijada, men u yerga o'tmadim, garchi keyinchalik «Manchester Siti», «Inter», «Sevilya» va boshqa ko'plab klublarda o'ynagan bo'lsam ham», - deya futbolchining so'zlarini keltiradi derbyderbyderby.it.
Hozirda futbolchi erkin agent maqomida, lekin karerasini tugatmagan.